NIEU DE PRIMABERA

Si bel diya podiese l'ombre determinar cuán ye menester que plebese, ixe diya talmén abiese una guerra mundial. Porque ixo de que nunca plebe a gusto de toz ye gran berdá.

Y agora, en meyo de Semana Santa a nieu ye plegata. Aspero que traiga diners ta os campos, que ye lo mesmo que ta toz nusatros tamién, anque as inbersións no todas paran en a redolada.

Y tamién aspero que a tradizional prozesión d'o Santo Entierro, an yeran "cuasi" toz os concellers, estiese buena ta rechirar as manieras de fer a politica.

Muitos son os que se creyen ya con lo reito guañau ta gobernar, continando con ixa lei que m'en dizié un politico fa unos meses: bi-ha dos berdaz no respuliables, l'una no pas se, porque cadagún la fa ta la suya mida, l'atra ye que o PAR estará gobernando pa cutio. Marcha leba.

Antiparti, tamién estarba bien que en os plenos se diziesen cosas de fondo. Porque si lo que quieren amostrar ye que con o PAR en o gobierno Biel mos abiese dáu muitos más diners, ye esclatero. Pero ixo dize muito (o mui poco) d'esas trazas de gobernar.